ਭਾਰਤ ਦਾ ਵੇਟਲਿਫਟਿੰਗ ’ਚ 28 ਸਾਲਾਂ ਦਾ ਮੈਡਲ ਇੰਤਜ਼ਾਰ ਖ਼ਤਮ; 198 ਕਿਲੋ ਭਾਰ ਚੁੱਕ ਕੇ ਮਹਿਲਾ 49 ਕਿਲੋ ਵਰਗ ’ਚ ਰਹੀ ਦੂਜੇ ਸਥਾਨ ’ਤੇ
ਨਾਗੋਆ (ਜਾਪਾਨ), 23 ਸਤੰਬਰ: ਭਾਰਤ ਦੀ ਸਟਾਰ ਵੇਟਲਿਫਟਰ ਸੈਖੋਮ ਮੀਰਾਬਾਈ ਚਾਨੂ ਨੇ ਆਈਚੀ-ਨਾਗੋਆ ਏਸ਼ੀਅਨ ਗੇਮਜ਼ 2026 ਵਿੱਚ ਇਤਿਹਾਸ ਰਚਦਿਆਂ ਮਹਿਲਾਵਾਂ ਦੇ 49 ਕਿਲੋ ਭਾਰ ਵਰਗ ਵਿੱਚ ਚਾਂਦੀ ਦਾ ਤਮਗਾ ਜਿੱਤ ਲਿਆ। ਇਸ ਦੇ ਨਾਲ ਹੀ ਭਾਰਤ ਦਾ ਏਸ਼ੀਅਨ ਗੇਮਜ਼ ਵੇਟਲਿਫਟਿੰਗ ਵਿੱਚ ਮੈਡਲ ਲਈ ਚੱਲ ਰਿਹਾ 28 ਸਾਲਾਂ ਦਾ ਇੰਤਜ਼ਾਰ ਵੀ ਖ਼ਤਮ ਹੋ ਗਿਆ।
ਟੋਕੀਓ ਓਲੰਪਿਕ ਦੀ ਚਾਂਦੀ ਤਮਗਾ ਜੇਤੂ ਮੀਰਾਬਾਈ ਨੇ ਸਨੈਚ ਵਿੱਚ 87 ਕਿਲੋ ਅਤੇ ਕਲੀਨ ਐਂਡ ਜਰਕ ਵਿੱਚ 111 ਕਿਲੋ ਭਾਰ ਚੁੱਕਦਿਆਂ ਕੁੱਲ 198 ਕਿਲੋ ਦੇ ਪ੍ਰਦਰਸ਼ਨ ਨਾਲ ਦੂਜਾ ਸਥਾਨ ਹਾਸਲ ਕੀਤਾ।
ਉੱਤਰੀ ਕੋਰੀਆ ਦੀ ਰੀ ਸੋਂਗ ਗੁਮ ਨੇ ਰਿਕਾਰਡਤੋੜ ਪ੍ਰਦਰਸ਼ਨ ਕਰਦਿਆਂ 94 ਕਿਲੋ ਸਨੈਚ ਅਤੇ 121 ਕਿਲੋ ਕਲੀਨ ਐਂਡ ਜਰਕ ਸਮੇਤ ਕੁੱਲ 215 ਕਿਲੋ ਭਾਰ ਚੁੱਕ ਕੇ ਸੋਨ ਤਮਗਾ ਜਿੱਤਿਆ। ਇਹ ਉਸ ਦਾ ਲਗਾਤਾਰ ਤੀਜਾ ਏਸ਼ੀਅਨ ਗੇਮਜ਼ ਸੋਨ ਤਮਗਾ ਹੈ। ਇੰਡੋਨੇਸ਼ੀਆ ਦੀ ਲੁਲੁਕ ਡਾਇਨਾ ਤ੍ਰੀ ਵਿਜਯਾਨਾ ਨੇ 191 ਕਿਲੋ ਨਾਲ ਕਾਂਸੀ ਦਾ ਤਮਗਾ ਹਾਸਲ ਕੀਤਾ।
28 ਸਾਲ ਬਾਅਦ ਭਾਰਤ ਨੂੰ ਵੇਟਲਿਫਟਿੰਗ ’ਚ ਮੈਡਲ
ਮੀਰਾਬਾਈ ਦੀ ਇਹ ਕਾਮਯਾਬੀ ਭਾਰਤੀ ਵੇਟਲਿਫਟਿੰਗ ਲਈ ਖਾਸ ਮਹੱਤਵ ਰੱਖਦੀ ਹੈ। ਇਸ ਤੋਂ ਪਹਿਲਾਂ ਕਰਨਮ ਮੱਲੇਸ਼ਵਰੀ ਨੇ 1998 ਬੈਂਕਾਕ ਏਸ਼ੀਅਨ ਗੇਮਜ਼ ਵਿੱਚ ਚਾਂਦੀ ਦਾ ਤਮਗਾ ਜਿੱਤਿਆ ਸੀ। ਉਸ ਤੋਂ ਬਾਅਦ ਭਾਰਤ ਨੂੰ ਇਸ ਖੇਡ ਵਿੱਚ ਏਸ਼ੀਅਨ ਗੇਮਜ਼ ਮੈਡਲ ਲਈ 28 ਸਾਲ ਉਡੀਕ ਕਰਨੀ ਪਈ।
32 ਸਾਲਾ ਮੀਰਾਬਾਈ ਨੇ ਸਨੈਚ ਵਿੱਚ ਆਪਣੇ ਤਿੰਨੇ ਯਤਨ ਸਫਲ ਕੀਤੇ। ਉਨ੍ਹਾਂ ਨੇ ਪਹਿਲਾਂ 83 ਕਿਲੋ, ਫਿਰ 85 ਕਿਲੋ ਅਤੇ ਤੀਜੇ ਯਤਨ ਵਿੱਚ 87 ਕਿਲੋ ਭਾਰ ਚੁੱਕਿਆ। ਕਲੀਨ ਐਂਡ ਜਰਕ ਵਿੱਚ ਉਨ੍ਹਾਂ ਦਾ ਸਰਵੋਤਮ ਸਫਲ ਯਤਨ 111 ਕਿਲੋ ਰਿਹਾ।
12 ਸਾਲਾਂ ਬਾਅਦ ਪੂਰਾ ਹੋਇਆ ਏਸ਼ੀਅਨ ਗੇਮਜ਼ ਮੈਡਲ ਦਾ ਸੁਪਨਾ
ਮੀਰਾਬਾਈ ਲਈ ਇਹ ਉਨ੍ਹਾਂ ਦੇ ਕਰੀਅਰ ਦਾ ਪਹਿਲਾ ਏਸ਼ੀਅਨ ਗੇਮਜ਼ ਮੈਡਲ ਹੈ। ਉਨ੍ਹਾਂ ਨੇ 2014 ਵਿੱਚ ਪਹਿਲੀ ਵਾਰ ਏਸ਼ੀਅਨ ਗੇਮਜ਼ ਵਿੱਚ ਹਿੱਸਾ ਲਿਆ ਸੀ, ਜਿੱਥੇ ਉਹ ਨੌਵੇਂ ਸਥਾਨ ’ਤੇ ਰਹੀ। ਸੱਟ ਕਾਰਨ ਉਹ 2018 ਦੀਆਂ ਖੇਡਾਂ ਵਿੱਚ ਹਿੱਸਾ ਨਹੀਂ ਲੈ ਸਕੀ, ਜਦਕਿ ਹਾਂਗਝੂ 2023 ਵਿੱਚ ਸੱਟ ਨਾਲ ਜੂਝਦਿਆਂ ਚੌਥੇ ਸਥਾਨ ’ਤੇ ਰਹਿ ਕੇ ਮੈਡਲ ਤੋਂ ਖੁੰਝ ਗਈ ਸੀ।
ਇਸ ਚਾਂਦੀ ਦੇ ਤਮਗੇ ਨਾਲ ਮੀਰਾਬਾਈ ਦੇ ਸ਼ਾਨਦਾਰ ਕਰੀਅਰ ਵਿੱਚ ਉਹ ਵੱਡੀ ਉਪਲਬਧੀ ਵੀ ਸ਼ਾਮਲ ਹੋ ਗਈ, ਜਿਸ ਦੀ ਉਹ ਲੰਮੇ ਸਮੇਂ ਤੋਂ ਉਡੀਕ ਕਰ ਰਹੀ ਸੀ। ਉਹ ਓਲੰਪਿਕ, ਵਿਸ਼ਵ ਚੈਂਪੀਅਨਸ਼ਿਪ ਅਤੇ ਕਾਮਨਵੈਲਥ ਗੇਮਜ਼ ਵਿੱਚ ਪਹਿਲਾਂ ਹੀ ਤਮਗੇ ਜਿੱਤ ਚੁੱਕੀ ਹੈ।
ਪ੍ਰਧਾਨ ਮੰਤਰੀ ਮੋਦੀ ਨੇ ਦਿੱਤੀ ਵਧਾਈ
ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਮੀਰਾਬਾਈ ਚਾਨੂ ਨੂੰ ਚਾਂਦੀ ਦਾ ਤਮਗਾ ਜਿੱਤਣ ’ਤੇ ਵਧਾਈ ਦਿੱਤੀ। ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਮੀਰਾਬਾਈ ਦੀ ਦ੍ਰਿੜ੍ਹਤਾ ਅਤੇ ਲਗਾਤਾਰ ਸ਼ਾਨਦਾਰ ਪ੍ਰਦਰਸ਼ਨ ਦੇਸ਼ ਨੂੰ ਪ੍ਰੇਰਿਤ ਕਰਦਾ ਹੈ ਅਤੇ ਭਾਰਤ ਨੂੰ ਉਨ੍ਹਾਂ ’ਤੇ ਮਾਣ ਹੈ।
ਮੀਰਾਬਾਈ ਦਾ ਇਹ ਤਮਗਾ ਨਾ ਸਿਰਫ਼ ਉਨ੍ਹਾਂ ਦੇ ਨਿੱਜੀ ਕਰੀਅਰ ਦੀ ਇੱਕ ਵੱਡੀ ਪ੍ਰਾਪਤੀ ਹੈ, ਸਗੋਂ ਇਸ ਨੇ 28 ਸਾਲਾਂ ਬਾਅਦ ਏਸ਼ੀਅਨ ਗੇਮਜ਼ ਦੇ ਵੇਟਲਿਫਟਿੰਗ ਪੋਡੀਅਮ ’ਤੇ ਭਾਰਤ ਦੀ ਵਾਪਸੀ ਵੀ ਕਰਵਾ ਦਿੱਤੀ ਹੈ
