ਨੌਜਵਾਨ ਉੱਦਮੀਆਂ ਨੂੰ ਦੱਸਿਆ ਭਾਰਤ ਦੇ ਸਪੇਸ ਸੈਕਟਰ ਦੀ ‘ਯੁਵਾ ਊਰਜਾ’, ਸਰਕਾਰ ਵੱਲੋਂ ਹਰ ਸੰਭਵ ਸਹਿਯੋਗ ਦਾ ਭਰੋਸਾ

ਖੇਤੀਬਾੜੀ, ਪਸ਼ੂ ਪਾਲਣ, ਡੇਅਰੀ ਅਤੇ ਵਾਤਾਵਰਣ ਵਰਗੇ ਖੇਤਰਾਂ ਵਿੱਚ ਸਪੇਸ ਟੈਕਨਾਲੋਜੀ ਦੀ ਵਰਤੋਂ ਵਧਾਉਣ ਦਾ ਦਿੱਤਾ ਸੱਦਾ

ਨਵੀਂ ਦਿੱਲੀ, 21 ਅਗਸਤ 2026: ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਸ਼ੁੱਕਰਵਾਰ ਨੂੰ ਸੇਵਾ ਤੀਰਥ ਵਿਖੇ ਭਾਰਤ ਦੇ 20 ਸਪੇਸ-ਟੈਕ ਸਟਾਰਟਅੱਪਸ ਦੇ ਸੰਸਥਾਪਕਾਂ ਅਤੇ ਸੀ.ਈ.ਓਜ਼. ਨਾਲ ਮੁਲਾਕਾਤ ਕੀਤੀ। ਇਸ ਦੌਰਾਨ ਉਨ੍ਹਾਂ ਨੇ ਨਿੱਜੀ ਖੇਤਰ ਦੇ ਨੌਜਵਾਨ ਉੱਦਮੀਆਂ ਵੱਲੋਂ ਸਪੇਸ ਟੈਕਨਾਲੋਜੀ ਵਰਗੇ ਚੁਣੌਤੀਪੂਰਨ ਖੇਤਰ ਵਿੱਚ ਕੀਤੇ ਜਾ ਰਹੇ ਕੰਮ ਦੀ ਸ਼ਲਾਘਾ ਕੀਤੀ ਅਤੇ ਭਰੋਸਾ ਦਿੱਤਾ ਕਿ ਕੇਂਦਰ ਸਰਕਾਰ ਭਵਿੱਖ ਵਿੱਚ ਵੀ ਉਨ੍ਹਾਂ ਦੇ ਨਾਲ ਖੜ੍ਹੀ ਰਹੇਗੀ।

ਪ੍ਰਧਾਨ ਮੰਤਰੀ ਨੇ ਇਨ੍ਹਾਂ ਨੌਜਵਾਨ ਉੱਦਮੀਆਂ ਨੂੰ ਭਾਰਤ ਦੇ ਸਪੇਸ ਸੈਕਟਰ ਦੀ ‘ਯੁਵਾ ਊਰਜਾ’ ਕਰਾਰ ਦਿੱਤਾ। ਉਨ੍ਹਾਂ ਕਿਹਾ ਕਿ ਇਨ੍ਹਾਂ ਨੌਜਵਾਨਾਂ ਨੇ ਇੱਕ ਨਵੇਂ ਅਤੇ ਬੇਹੱਦ ਚੁਣੌਤੀਪੂਰਨ ਖੇਤਰ ਵਿੱਚ ਕਦਮ ਰੱਖ ਕੇ ਹਿੰਮਤ ਦਿਖਾਈ ਹੈ। ਉਨ੍ਹਾਂ ਨੇ ਜੋਖਮ ਲਿਆ, ਸਰਕਾਰ ਵੱਲੋਂ ਕੀਤੇ ਗਏ ਸੁਧਾਰਾਂ ’ਤੇ ਭਰੋਸਾ ਕੀਤਾ ਅਤੇ ਆਪਣੇ ਯਤਨਾਂ ਵਿੱਚ ਲਗਾਤਾਰ ਅੱਗੇ ਵਧਦੇ ਰਹੇ। ਇਸੇ ਦਾ ਨਤੀਜਾ ਹੈ ਕਿ ਪਿਛਲੇ ਕੁਝ ਸਾਲਾਂ ਵਿੱਚ ਭਾਰਤ ਨੇ ਸਪੇਸ ਸੈਕਟਰ ਵਿੱਚ ਮਹੱਤਵਪੂਰਨ ਤਰੱਕੀ ਕੀਤੀ ਹੈ।

ਸਟਾਰਟਅੱਪਸ ਨੇ PM ਮੋਦੀ ਸਾਹਮਣੇ ਪੇਸ਼ ਕੀਤੇ ਆਪਣੇ ਪ੍ਰੋਜੈਕਟ

ਮੁਲਾਕਾਤ ਦੌਰਾਨ ਵੱਖ-ਵੱਖ ਸਟਾਰਟਅੱਪਸ ਦੇ ਨੁਮਾਇੰਦਿਆਂ ਨੇ ਪ੍ਰਧਾਨ ਮੰਤਰੀ ਸਾਹਮਣੇ ਆਪਣੇ ਕੰਮ ਅਤੇ ਤਕਨੀਕੀ ਪ੍ਰੋਜੈਕਟਾਂ ਬਾਰੇ ਪੇਸ਼ਕਾਰੀਆਂ ਦਿੱਤੀਆਂ। ਉੱਦਮੀਆਂ ਨੇ ਸਪੇਸ ਸੈਕਟਰ ਨੂੰ ਨਿੱਜੀ ਕੰਪਨੀਆਂ ਲਈ ਖੋਲ੍ਹਣ ਅਤੇ ਪ੍ਰਾਈਵੇਟ ਭਾਗੀਦਾਰੀ ਨੂੰ ਉਤਸ਼ਾਹਿਤ ਕਰਨ ਲਈ ਸਰਕਾਰ ਵੱਲੋਂ ਕੀਤੇ ਗਏ ਨੀਤੀਗਤ ਸੁਧਾਰਾਂ ਦੀ ਵੀ ਸ਼ਲਾਘਾ ਕੀਤੀ।

ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਭਾਰਤ ਦੁਨੀਆ ਸਾਹਮਣੇ ਸਪੇਸ ਸੈਕਟਰ ਵਿੱਚ ਇੱਕ ਮਜ਼ਬੂਤ, ਨਵੀਨਤਾਕਾਰੀ ਅਤੇ ਵਪਾਰਕ ਤੌਰ ’ਤੇ ਸਫਲ ਮਾਡਲ ਪੇਸ਼ ਕਰਨ ਦੀ ਸਮਰੱਥਾ ਰੱਖਦਾ ਹੈ। ਉਨ੍ਹਾਂ ਭਰੋਸਾ ਦਿੱਤਾ ਕਿ ਦੇਸ਼ ਦੀਆਂ ਭਵਿੱਖੀ ਸਮਰੱਥਾਵਾਂ ਨੂੰ ਵਿਕਸਤ ਕਰਨ ਵਿੱਚ ਸਰਕਾਰ ਸਟਾਰਟਅੱਪਸ ਦਾ ਸਾਥ ਜਾਰੀ ਰੱਖੇਗੀ।

ਖੇਤੀ ਤੋਂ ਡੇਅਰੀ ਤੱਕ ਸਪੇਸ ਟੈਕਨਾਲੋਜੀ ਦੀ ਵਰਤੋਂ ’ਤੇ ਜ਼ੋਰ

ਪ੍ਰਧਾਨ ਮੰਤਰੀ ਨੇ ਸਪੇਸ-ਟੈਕ ਕੰਪਨੀਆਂ ਨੂੰ ਸਿਰਫ਼ ਰਾਕੇਟ ਅਤੇ ਸੈਟੇਲਾਈਟ ਤੱਕ ਸੀਮਤ ਨਾ ਰਹਿਣ ਦੀ ਸਲਾਹ ਦਿੰਦਿਆਂ ਕਿਹਾ ਕਿ ਇਹ ਦੇਖਣ ਦੀ ਲੋੜ ਹੈ ਕਿ ਸਪੇਸ ਟੈਕਨਾਲੋਜੀ ਨੂੰ ਆਮ ਲੋਕਾਂ ਦੀ ਜ਼ਿੰਦਗੀ ਨਾਲ ਹੋਰ ਵੱਧ ਕਿਵੇਂ ਜੋੜਿਆ ਜਾ ਸਕਦਾ ਹੈ।

ਉਨ੍ਹਾਂ ਨੇ ਖਾਸ ਤੌਰ ’ਤੇ ਖੇਤੀਬਾੜੀ, ਪਸ਼ੂ ਪਾਲਣ, ਡੇਅਰੀ, ਵਾਤਾਵਰਣ ਅਤੇ ਮੌਸਮ ਵਰਗੇ ਖੇਤਰਾਂ ਵਿੱਚ ਸਪੇਸ ਟੈਕਨਾਲੋਜੀ ਦੀ ਵਰਤੋਂ ਦੀਆਂ ਸੰਭਾਵਨਾਵਾਂ ਖੋਜਣ ਲਈ ਕਿਹਾ।

ਉਨ੍ਹਾਂ ਸੁਝਾਅ ਦਿੱਤਾ ਕਿ ਖੇਤੀਬਾੜੀ ਨਾਲ ਸਬੰਧਤ ਸਪੇਸ-ਟੈਕ ਕੰਪਨੀਆਂ ਯੂਨੀਵਰਸਿਟੀਆਂ ਅਤੇ ਸਰਕਾਰੀ ਵਿਭਾਗਾਂ ਨਾਲ ਮਿਲ ਕੇ ਅਜਿਹੇ ਹੱਲ ਤਿਆਰ ਕਰਨ ਜੋ ਸਿੱਧੇ ਤੌਰ ’ਤੇ ਕਿਸਾਨਾਂ ਲਈ ਲਾਭਦਾਇਕ ਹੋਣ। ਇਸੇ ਤਰ੍ਹਾਂ ਸਪੇਸ ਡੈਬ੍ਰਿਸ ’ਤੇ ਕੰਮ ਕਰਨ ਵਾਲੀਆਂ ਕੰਪਨੀਆਂ ਵਾਤਾਵਰਣ ਨਾਲ ਜੁੜੀਆਂ ਸੰਸਥਾਵਾਂ ਨਾਲ ਸਹਿਯੋਗ ਕਰ ਸਕਦੀਆਂ ਹਨ।

‘ਦੁਨੀਆ ਸਪੇਸ ਬਾਰੇ ਸੋਚੇ ਤਾਂ ਭਾਰਤ ਵੱਲ ਦੇਖੇ’

ਪ੍ਰਧਾਨ ਮੰਤਰੀ ਨੇ ਭਾਰਤ ਦੇ ਨਿੱਜੀ ਸਪੇਸ ਸੈਕਟਰ ਲਈ ਵੱਡੀਆਂ ਗਲੋਬਲ ਸੰਭਾਵਨਾਵਾਂ ਦਾ ਜ਼ਿਕਰ ਕਰਦਿਆਂ ਕਿਹਾ ਕਿ ਦੁਨੀਆ ਦੇ ਕਈ ਦੇਸ਼ਾਂ ਕੋਲ ਸਪੇਸ ਸੈਕਟਰ ਵਿੱਚ ਵੱਡੇ ਪੱਧਰ ’ਤੇ ਨਿਵੇਸ਼ ਕਰਨ ਲਈ ਜਾਂ ਤਾਂ ਲੋੜੀਂਦੇ ਸਰੋਤ ਨਹੀਂ ਹਨ ਜਾਂ ਫਿਰ ਇੱਛਾ ਸ਼ਕਤੀ ਦੀ ਘਾਟ ਹੈ। ਅਜਿਹੀ ਸਥਿਤੀ ਵਿੱਚ ਭਾਰਤ ਲਈ ਆਪਣੀ ਗਲੋਬਲ ਸਥਿਤੀ ਹੋਰ ਮਜ਼ਬੂਤ ਕਰਨ ਦਾ ਵੱਡਾ ਮੌਕਾ ਹੈ।

ਉਨ੍ਹਾਂ ਅਜਿਹਾ ਈਕੋਸਿਸਟਮ ਬਣਾਉਣ ਦਾ ਸੱਦਾ ਦਿੱਤਾ ਕਿ ਜਦੋਂ ਦੁਨੀਆ ਸਪੇਸ ਟੈਕਨਾਲੋਜੀ ਬਾਰੇ ਸੋਚੇ ਤਾਂ ਉਸ ਦੀ ਨਜ਼ਰ ਭਾਰਤ ਵੱਲ ਹੋਵੇ।

ਮੋਦੀ ਨੇ ਕਿਹਾ ਕਿ ਭਾਰਤ ਦਾ ਪ੍ਰਾਈਵੇਟ ਸਪੇਸ ਸੈਕਟਰ ਭਵਿੱਖ ਵਿੱਚ ਦੁਨੀਆ ਭਰ ਦੀਆਂ ਪ੍ਰਤਿਭਾਵਾਂ, ਕੰਪਨੀਆਂ ਅਤੇ ਨਿਵੇਸ਼ ਲਈ ਇੱਕ ਵੱਡਾ ਆਕਰਸ਼ਣ ਕੇਂਦਰ ਬਣ ਸਕਦਾ ਹੈ।

Skyroot, Agnikul ਅਤੇ Pixxel ਸਮੇਤ ਕਈ ਸਟਾਰਟਅੱਪਸ ਨੇ ਲਿਆ ਹਿੱਸਾ

ਇਸ ਮੁਲਾਕਾਤ ਵਿੱਚ ਸ਼ਾਮਲ ਕੰਪਨੀਆਂ ਰਾਕੇਟ ਅਤੇ ਰੀਯੂਜ਼ੇਬਲ ਲਾਂਚ ਵਹੀਕਲ, ਸੈਟੇਲਾਈਟ, ਐਵੀਓਨਿਕਸ, ਐਡਵਾਂਸਡ ਪ੍ਰੋਪਲਸ਼ਨ, ਸਪੇਸ ਅਤੇ ਡਿਫੈਂਸ ਇੰਟੈਲੀਜੈਂਸ, ਸਪੇਸ ਡੈਬ੍ਰਿਸ ਮੈਨੇਜਮੈਂਟ ਅਤੇ AI ਆਧਾਰਿਤ ਮੌਸਮ ਤੇ ਜਲਵਾਯੂ ਹੱਲਾਂ ਸਮੇਤ ਕਈ ਖੇਤਰਾਂ ਵਿੱਚ ਕੰਮ ਕਰ ਰਹੀਆਂ ਹਨ।

ਇਨ੍ਹਾਂ ਵਿੱਚ Skyroot Aerospace, Agnikul Cosmos, Pixxel, Dhruva Space, GalaxEye, Bellatrix Aerospace ਅਤੇ Digantara ਸਮੇਤ ਕਈ ਭਾਰਤੀ ਸਪੇਸ-ਟੈਕ ਕੰਪਨੀਆਂ ਸ਼ਾਮਲ ਹਨ।

ਸਕੂਲੀ ਬੱਚਿਆਂ ਨੂੰ ਵੀ ਸਪੇਸ ਟੈਕਨਾਲੋਜੀ ਨਾਲ ਜੋੜਨ ਦਾ ਸੱਦਾ

ਪ੍ਰਧਾਨ ਮੰਤਰੀ ਨੇ ਸਟਾਰਟਅੱਪਸ ਨੂੰ Atal Tinkering Labs ਨਾਲ ਜੁੜਨ ਲਈ ਵੀ ਪ੍ਰੇਰਿਤ ਕੀਤਾ, ਤਾਂ ਜੋ ਸਕੂਲੀ ਵਿਦਿਆਰਥੀਆਂ ਵਿੱਚ ਵਿਗਿਆਨ, ਸਪੇਸ ਅਤੇ ਨਵੀਨਤਾ ਪ੍ਰਤੀ ਉਤਸੁਕਤਾ ਪੈਦਾ ਕੀਤੀ ਜਾ ਸਕੇ।

ਉਨ੍ਹਾਂ ਕਿਹਾ ਕਿ ਅੱਜ ਦੇ ਵਿਦਿਆਰਥੀਆਂ ਨੂੰ ਨਵੀਂ ਤਕਨੀਕ ਨਾਲ ਜੋੜਨਾ ਭਵਿੱਖ ਦੇ ਵਿਗਿਆਨੀਆਂ, ਇੰਜੀਨੀਅਰਾਂ ਅਤੇ ਉੱਦਮੀਆਂ ਨੂੰ ਤਿਆਰ ਕਰਨ ਵਿੱਚ ਮਹੱਤਵਪੂਰਨ ਭੂਮਿਕਾ ਨਿਭਾ ਸਕਦਾ ਹੈ।

ਭਾਰਤ ਵਿੱਚ ਨੀਤੀਗਤ ਸੁਧਾਰਾਂ ਤੋਂ ਬਾਅਦ ਨਿੱਜੀ ਸਪੇਸ ਕੰਪਨੀਆਂ ਦੀ ਭਾਗੀਦਾਰੀ ਤੇਜ਼ੀ ਨਾਲ ਵਧੀ ਹੈ। ਪ੍ਰਧਾਨ ਮੰਤਰੀ ਦੀ 20 ਸਪੇਸ-ਟੈਕ ਸਟਾਰਟਅੱਪਸ ਨਾਲ ਇਹ ਮੁਲਾਕਾਤ ਇਸ ਗੱਲ ਦਾ ਸੰਕੇਤ ਹੈ ਕਿ ਸਰਕਾਰ ਹੁਣ ਨਿੱਜੀ ਖੇਤਰ ਦੀ ਨਵੀਨਤਾ ਅਤੇ ਨਿਵੇਸ਼ ਨੂੰ ਭਾਰਤ ਨੂੰ ਗਲੋਬਲ ਸਪੇਸ ਟੈਕਨਾਲੋਜੀ ਪਾਵਰ ਬਣਾਉਣ ਦੀ ਰਣਨੀਤੀ ਦਾ ਅਹਿਮ ਹਿੱਸਾ ਮੰਨ ਰਹੀ ਹੈ।