CISF ਨੇ ਸਕ੍ਰੀਨਿੰਗ ਦੌਰਾਨ ਫੜੇ 500 ਗ੍ਰਾਮ ਵਜ਼ਨੀ 5 ਸੋਨੇ ਦੇ ਕੰਗਣ; 800 ਗ੍ਰਾਮ ਚਾਂਦੀ ਦੇ ਗਹਿਣੇ ਵੀ ਮਿਲੇ

ਅਗਰਤਲਾ, 16 ਸਤੰਬਰ: ਤ੍ਰਿਪੁਰਾ ਦੇ ਅਗਰਤਲਾ ਏਅਰਪੋਰਟ ’ਤੇ ਕੇਂਦਰੀ ਉਦਯੋਗਿਕ ਸੁਰੱਖਿਆ ਬਲ (CISF) ਦੇ ਜਵਾਨਾਂ ਨੇ ਰੁਟੀਨ ਸੁਰੱਖਿਆ ਜਾਂਚ ਦੌਰਾਨ ਇੱਕ ਯਾਤਰੀ ਕੋਲੋਂ ਕਰੀਬ 500 ਗ੍ਰਾਮ ਸ਼ੱਕੀ ਸੋਨਾ ਬਰਾਮਦ ਕੀਤਾ ਹੈ, ਜਿਸ ਦੀ ਅੰਦਾਜ਼ਨ ਕੀਮਤ 70 ਲੱਖ ਰੁਪਏ ਦੱਸੀ ਗਈ ਹੈ। ਇਸ ਤੋਂ ਇਲਾਵਾ ਕਰੀਬ 800 ਗ੍ਰਾਮ ਚਾਂਦੀ ਦੇ ਗਹਿਣੇ ਵੀ ਬਰਾਮਦ ਹੋਏ ਹਨ।

CISF ਵੱਲੋਂ ਦਿੱਤੀ ਜਾਣਕਾਰੀ ਮੁਤਾਬਕ ਇਹ ਕਾਰਵਾਈ 15 ਸਤੰਬਰ 2026 ਨੂੰ ਕੀਤੀ ਗਈ। ਯਾਤਰੀ ਦੇ ਸਾਮਾਨ ਦੀ X-BIS (X-ray Baggage Inspection System) ਰਾਹੀਂ ਜਾਂਚ ਦੌਰਾਨ CISF ਕਰਮਚਾਰੀਆਂ ਨੂੰ ਐਕਸ-ਰੇਅ ਸਕ੍ਰੀਨ ’ਤੇ ਭਾਰੀ ਧਾਤੂ ਦੀ ਮੌਜੂਦਗੀ ਦਰਸਾਉਂਦੀ ਸ਼ੱਕੀ ਤਸਵੀਰ ਨਜ਼ਰ ਆਈ।

ਇਸ ਤੋਂ ਬਾਅਦ ਬੈਗ ਨੂੰ ਤੁਰੰਤ ਫਿਜ਼ੀਕਲ ਚੈਕਿੰਗ ਲਈ ਭੇਜਿਆ ਗਿਆ। ਜਾਂਚ ਦੌਰਾਨ ਬੈਗ ਵਿੱਚੋਂ ਤਿੰਨ ਸ਼ੱਕੀ ਸੋਨੇ ਦੇ ਕੰਗਣ ਅਤੇ ਚਾਂਦੀ ਦੇ ਗਹਿਣੇ ਬਰਾਮਦ ਹੋਏ।

ਤਲਾਸ਼ੀ ਦੌਰਾਨ ਦੋ ਹੋਰ ਕੰਗਣ ਮਿਲੇ

CISF ਅਨੁਸਾਰ ਯਾਤਰੀ ਦੀ ਨਿੱਜੀ ਤਲਾਸ਼ੀ ਦੌਰਾਨ ਦੋ ਹੋਰ ਸ਼ੱਕੀ ਸੋਨੇ ਦੇ ਕੰਗਣ ਮਿਲੇ। ਇਸ ਤਰ੍ਹਾਂ ਕੁੱਲ ਪੰਜ ਕੰਗਣਾਂ ਦਾ ਵਜ਼ਨ ਕਰੀਬ 500 ਗ੍ਰਾਮ ਪਾਇਆ ਗਿਆ।

ਇਸ ਦੇ ਨਾਲ ਬਰਾਮਦ ਚਾਂਦੀ ਦੇ ਗਹਿਣਿਆਂ ਦਾ ਵਜ਼ਨ ਕਰੀਬ 800 ਗ੍ਰਾਮ ਅਤੇ ਅੰਦਾਜ਼ਨ ਕੀਮਤ ਲਗਭਗ 2 ਲੱਖ ਰੁਪਏ ਦੱਸੀ ਗਈ ਹੈ।

ਦਸਤਾਵੇਜ਼ ਪੇਸ਼ ਨਾ ਕਰ ਸਕਿਆ ਯਾਤਰੀ

CISF ਦੇ ਬਿਆਨ ਮੁਤਾਬਕ ਯਾਤਰੀ ਬਰਾਮਦ ਕੀਤੀਆਂ ਵਸਤੂਆਂ ਨਾਲ ਸਬੰਧਤ ਵੈਧ ਦਸਤਾਵੇਜ਼ ਪੇਸ਼ ਨਹੀਂ ਕਰ ਸਕਿਆ। ਪੁੱਛਗਿੱਛ ਦੌਰਾਨ ਉਸ ਨੇ ਕਥਿਤ ਤੌਰ ’ਤੇ ਦੱਸਿਆ ਕਿ ਸੋਨਾ ਸਰਹੱਦ ਪਾਰੋਂ ਲਿਆਂਦਾ ਗਿਆ ਸੀ ਅਤੇ ਗਹਿਣੇ ਬਣਾਉਣ ਲਈ ਕੋਲਕਾਤਾ ਭੇਜਿਆ ਜਾਣਾ ਸੀ।

CISF ਨੇ ਯਾਤਰੀ ਅਤੇ ਬਰਾਮਦ ਸੋਨੇ-ਚਾਂਦੀ ਦੇ ਗਹਿਣਿਆਂ ਨੂੰ ਅਗਲੀ ਕਾਨੂੰਨੀ ਕਾਰਵਾਈ ਲਈ ਕਸਟਮ ਵਿਭਾਗ ਦੇ ਹਵਾਲੇ ਕਰ ਦਿੱਤਾ ਹੈ।

ਮਾਮਲੇ ਵਿੱਚ ਸੋਨੇ ਦੀ ਅਸਲ ਸ਼ੁੱਧਤਾ, ਸਰੋਤ ਅਤੇ ਕਥਿਤ ਤਸਕਰੀ ਨਾਲ ਸਬੰਧਤ ਹੋਰ ਪਹਿਲੂਆਂ ਦੀ ਜਾਂਚ ਕਸਟਮ ਅਧਿਕਾਰੀਆਂ ਵੱਲੋਂ ਕੀਤੀ ਜਾਵੇਗੀ।